Ea rēs est Helvētiīs per indicium ēnūntiāta. Mōribus suīs Orgetorigem ex vinculīs causam dīcere coēgērunt. Damnātum poenam sequī oportēbat ut ignī cremārētur.
Diē cōnstitūtā causae dictiōnis Orgetorīx ad iūdicium omnem suam familiam, ad hominum mīlia decem, undique coēgit, et omnīs clientīs obaerātōsque suōs, quōrum māgnum numerum habēbat, eōdem condūxit; per eōs nē causam dīceret sē ēripuit.
Cum cīvitās ob eam rem incitāta armīs iūs suum exsequī cōnārētur, multitūdinemque hominum ex agrīs magistrātūs cōgerent, Orgetorīx mortuus est; neque abest suspīciō, ut Helvētiī arbitrantur, quīn ipse sibī mortem cōnscīverit.