Caesar ab decimae legiōnis cohortātiōne ad dextrum cornū profectus, ubī suōs urgērī sīgnīsque in ūnum locum conlātīs duodecimae legiōnis cōnfertōs mīlitēs sibī ipsōs ad pūgnam esse impedīmentō vīdit, — quārtae cohortis omnibus centuriōnibus occīsīs, sīgniferō interfectō, sīgnō āmissō, reliquārum cohortium omnibus ferē centuriōnibus aut volnerātīs aut occīsīs, in hīs prīmipīlō P. Sextiō Baculō, fortissimō virō, multīs gravibusque volneribus cōnfectō, ut iam sē sustinēre nōn posset; reliquōs esse tardiōrēs et nōn nūllōs ab novissimīs dēsertō proeliō excēdere ac tēla vītāre, hostīs neque ā fronte ex īnferiōre locō subeuntīs intermittere et ab utrōque latere īnstāre, et rem esse in angustō vīdit neque ūllum esse subsidium quod submittī posset, — scūtō ab novissimīs [ūnī] mīlitī detrāctō, quod ipse eō sine scūtō vēnerat, in prīmam aciem prōcessit; centuriōnibusque nōminātim appellātīs reliquōs cohortātus mīlitēs sīgna īnferre et manipulōs laxāre iussit, quō facilius gladiīs ūtī possent. Cuius adventū spē inlātā mīlitibus ac redintegrātō animō, cum prō sē quisque in cōnspectū imperātōris etiam in extrēmīs suīs rēbus operam nāvāre cuperet, paulum hostium impetus tardātus est.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →