Quibus ex nāvibus cum essent expositī mīlitēs circiter ccc atque in castra contenderent, Morīnī, quōs Caesar in Britanniam proficīscēns pācātōs reliquerat, spē praedae adductī prīmō nōn ita māgnō suōrum numerō circumstetērunt ac, sī sēsē interficī nōllent, arma pōnere iussērunt. Cum illī orbe factō sēsē dēfenderent, celeriter ad clāmōrem hominum circiter mīlia VI convēnērunt. Quā rē nūntiātā Caesar omnem ex castrīs equitātum suīs auxiliō mīsit. Interim nostrī mīlitēs impetum hostium sustinuērunt atque amplius hōrīs IIII fortissimē pūgnāvērunt, et paucīs volneribus acceptīs complūrēs ex hīs occīdērunt. Posteā vērō quam equitātus noster in cōnspectum vēnit, hostēs abiectīs armīs terga vertērunt māgnusque eōrum numerus est occīsus.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →