Multīs dē causīs Caesar māiōrem Galliae mōtum exspectāns, per M. Silānum, C. Antistium Rēgīnum, T. Sextium lēgātōs dēlēctum habēre īnstituit; simul ab Cn. Pompēiō prōcōnsule petit, quoniam ipse ad urbem cum imperiō reī pūblicae causā remanēret, quōs ex Cisalpīnā Galliā cōnsul sacrāmentō rogāvisset ad sīgna convenīre et ad sē proficīscī iubēret; māgnī interesse etiam in reliquum tempus ad opīniōnem Galliae exīstimāns tantās vidērī Ītaliae facultātīs ut, sī quid esset in bellō dētrimentī acceptum, nōn modo id brevī tempore sarcīrī, sed etiam māiōribus augērī cōpiīs posset. Quod cum Pompēius et reī pūblicae et amīcitiae tribuisset, celeriter cōnfectō per suōs dēlēctū, tribus ante exāctam hiemem et cōnstitūtīs et adductīs legiōnibus, duplicātōque eārum cohortium numerō quās cum Q. Titūriō āmīserat, et celeritāte et cōpiīs docuit quid populī Rōmānī disciplīna atque opēs possent.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →