Germānī multum ab hāc cōnsuētūdine differunt. Nam neque druidēs habent quī rēbus dīvīnīs praesint neque sacrificiīs student. Deōrum numerō eōs sōlōs dūcunt quōs cernunt et quōrum apertē opibus iuvantur, Sōlem et Volcānum et Lūnam; reliquōs nē fāmā quidem accēpērunt. Vīta omnis in vēnātiōnibus atque in studiīs reī mīlitāris cōnsistit; ā parvīs labōrī ac dūritiae student. Quī diūtissimē impūberēs permānsērunt maximam inter suōs ferunt laudem; hōc alī statūram, alī vīrīs nervōsque cōnfīrmārī putant. Intrā annum vērō vīcēsimum fēminae nōtitiam habuisse in turpissimīs habent rēbus: cuius reī nūlla est occultātiō, quod et prōmiscuē in flūminibus perluuntur, et pellibus aut parvīs rēnōnum tegimentīs ūtuntur, māgnā corporis parte nūdā.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →