Germānī dēspērātā expūgnātiōne castrōrum, quod nostrōs iam cōnstitisse in mūnītiōnibus vidēbant, cum eā praedā quam in silvīs dēposuerant trāns Rhēnum sēsē recēpērunt. Ac tantus fuit etiam post discessum hostium terror ut eā nocte, cum C. Volusēnus missus cum equitātū in castra vēnisset, fidem nōn faceret adesse cum incolumī Caesarem exercitū. Sīc omnium animōs timor praeoccupāverat ut paene aliēnātā mente, dēlētīs omnibus cōpiīs, equitātum sē ex fugā recēpisse dīcerent, neque incolumī exercitū Germānōs castra oppūgnātūrōs fuisse contenderent. Quem timōrem Caesaris adventus sustulit.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →