Reversus ille,— ēventūs bellī nōn ignōrāns, ūnum quod cohortēs ex statiōne et praesidiō essent ēmissae questus, nē minimum quidem cāsuī locum relinquī dēbuisse, — multum fortūnam in repentīnō hostium adventū potuisse iūdicāvit; multō etiam amplius, quod paene ab ipsō vallō portīsque castrōrum barbarōs āvertisset. Quārum omnium rērum maximē admīrandum vidēbātur, quod Germānī, quī eō cōnsiliō Rhēnum trānsierant ut Ambiorigis fīnīs dēpopulārentur, ad castra Rōmānōrum dēlātī optātissimum Ambiorigī beneficium obtulerant.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →