Tālī modō vāstātīs regiōnibus exercitum Caesar duārum cohortium damnō Dūrocortorum Rēmōrum dēdūcit; conciliōque in eum locum Galliae indīctō dē coniūrātiōne Senonum et Carnūtum quaestiōnem habēre īnstituit; et dē Accōne, quī prīnceps eius cōnsilī fuerat, graviōre sententiā prōnūntiātā, mōre māiōrum supplicium sūmpsit. Nōn nūllī iūdicium veritī profūgērunt; quibus cum aquā atque ignī interdīxisset, duās legiōnēs ad fīnīs Trēverōrum, duās in Lingonibus, sex reliquās in Senonum fīnibus Agēdincī in hībernīs conlocāvit; frūmentōque exercituī prōvīsō, ut īnstituerat, in Ītaliam ad conventūs agendōs profectus est.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →