Equitēs hostium essedāriīque ācriter proeliō cum equitātū nostrō in itinere cōnflīxērunt, ita tamen ut nostrī omnibus partibus superiōrēs fuerint atque eōs in silvās collīsque compulerint; sed complūribus interfectīs cupidius īnsecūtī nōn nūllōs ex suīs āmīsērunt. At illī intermissō spatiō, imprūdentibus nostrīs atque occupātīs in mūnītiōne castrōrum, subitō sē ex silvīs ēiēcērunt, impetūque in eōs factō quī erant in statiōne prō castrīs conlocātī, ācriter pūgnāvērunt; duābusque missīs subsidiō cohortibus ā Caesare, atque hīs prīmīs legiōnum duārum, cum eae perexiguō intermissō locī spatiō inter sē cōnstitissent, novō genere pūgnae perterritīs nostrīs, per mediōs audācissimē perrūpērunt sēque inde incolumīs recēpērunt. Eō diē Q. Laberius Dūrus tribūnus mīlitum interficitur. Illī plūribus submissīs cohortibus repelluntur.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →