Ab hāc spē repulsī Nerviī vallō pedum x et fossā pedum quīndecim hīberna cingunt. Haec et superiōrum annōrum cōnsuētūdine ā nōbīs cōgnōverant et quōsdam dē exercitū nactī captīvōs ab hīs docēbantur; sed nūllā ferrāmentōrum cōpiā quae essent ad hunc ūsum idōnea, gladiīs caespitēs circumcīdere, manibus sagulīsque terram exhaurīre cōgēbantur. Quā quidem ex rē hominum multitūdō cōgnōscī potuit; nam minus hōrīs tribus mīlium passuum xv in circuitū mūnītiōnem perfēcērunt. Reliquīsque diēbus turrīs ad altitūdinem vallī, falcīs testūdinēsque, quās iīdem captīvī docuerant, parāre ac facere coepērunt.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →