Ubī intellēxit ultrō ad sē venīrī, alterā ex parte Senonēs Carnūtēsque cōnscientiā facinoris īnstīgārī, alterā Nerviōs Aduatucōsque bellum Rōmānīs parāre, neque sibī voluntāriōrum cōpiās dēfore sī ex fīnibus suīs prōgredī coepisset, armātum concilium indīcit. Hoc mōre Gallōrum est initium bellī, quō lēge commūnī omnēs pūberēs armātī convenīre cōguntur; quī ex eīs novissimus venit in cōnspectū multitūdinis omnibus cruciātibus adfectus necātur. In eō conciliō Cingetorigem, alterīus prīncipem factiōnis, generum suum, quem suprā dēmōnstrāvimus Caesaris secūtum fidem ab eō nōn discessisse, hostem iūdicat bonaque eius pūblicat. Hīs rēbus cōnfectīs in conciliō prōnūntiat arcessītum sē ā Senonibus et Carnūtibus aliīsque complūribus Galliae cīvitātibus; hūc itūrum per fīnīs Rēmōrum eōrumque agrōs populātūrum; ac prius quam id faciat, castra Labiēnī oppūgnātūrum: quae fierī velit praecipit.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →