Obsidibus acceptīs exercitum redūcit ad mare, nāvīs invenit refectās. Hīs dēductīs, quod et captīvōrum māgnum numerum habēbat et nōn nūllae tempestāte dēperierant nāvēs, duōbus commeātibus exercitum reportāre īnstituit. Ac sīc accidit utī ex tantō nāvium numerō, tot nāvigātiōnibus, neque hōc neque superiōre annō ūlla omnīnō nāvis quae mīlitēs portāret dēsīderārētur; at ex eīs quae inānēs ex continentī ad eum remitterentur, [et] priōris commeātūs expositīs mīlitibus, et quās posteā Labiēnus faciendās cūrāverat numerō LX, perpaucae locum caperent; reliquae ferē omnēs rēicerentur. Quās cum aliquamdiū Caesar frūstrā exspectāsset, nē annī tempore ā nāvigātiōne exclūderētur, quod aequinoctium suberat, necessāriō angustius mīlitēs conlocāvit, ac summā tranquillitāte cōnsecūtā, secundā initā cum solvisset vigiliā, prīmā lūce terram attigit omnīsque incolumīs nāvīs perdūxit.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →