Caesar acceptīs litterīs hōrā circiter XI diēī statim nūntium in Bellovacōs ad M. Crassum mittit, cuius hīberna aberant ab eō mīlia passuum XXV; iubet mediā nocte legiōnem proficīscī celeriterque ad sē venīre. Exit cum nūntiō Crassus. Alterum ad C. Fabium lēgātum mittit, ut in Atrebātium fīnīs legiōnem addūcat, quā sibī iter faciendum sciēbat. Scrībit Labiēnō, sī reī pūblicae commodō facere possit, cum legiōne ad fīnīs Nerviōrum veniat; reliquam partem exercitūs, quod paulō aberat longius, nōn putat exspectandam; equitēs circiter CCCC ex proximīs hībernīs conligit.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →