Interim ad Labiēnum per Rēmōs incrēdibilī celeritāte dē victōriā Caesaris fāma perfertur, ut, cum ab hībernīs Cicerōnis mīlia passuum abesset circiter sexāgintā, eōque post hōram nōnam diēī Caesar pervēnisset, ante mediam noctem ad portās castrōrum clāmor orīrētur, quō clāmōre sīgnificātiō victōriae grātulātiōque ab Rēmīs Labiēnō fieret. Hāc fāmā ad Trēverōs perlātā Indūtiomārus, quī posterō diē castra Labiēnī oppūgnāre dēcrēverat, noctū profūgit cōpiāsque omnīs in Trēverōs redūcit. Caesar Fabium cum suā legiōne remittit in hīberna, ipse cum III legiōnibus circum Samarobrīvam trīnīs hībernīs hiemāre cōnstituit; et, quod tantī mōtūs Galliae exstiterant, tōtam hiemem ipse ad exercitum manēre dēcrēvit. Nam illō incommodō dē Sabīnī morte perlātō omnēs ferē Galliae cīvitātēs dē bellō cōnsultābant; nūntiōs lēgātiōnēsque in omnīs partīs dīmittēbant; et quid reliquī cōnsilī caperent atque unde initium bellī fieret explōrābant, nocturnaque in locīs dēsertīs concilia habēbant. Neque ūllum ferē tōtīus hiemis tempus sine sollicitūdine Caesaris intercessit quīn aliquem dē cōnsiliīs ac mōtū Gallōrum nūntium acciperet. In hīs ab L. Rōsciō, quem legiōnī XIII praefēcerat, certior factus est māgnās [Gallōrum] cōpiās eārum cīvitātum quae Aremoricae appellantur oppūgnandī suī causā convēnisse neque longius mīlibus passuum VIII ab hībernīs suīs āfuisse, sed nūntiō adlātō dē victōriā Caesaris, discessisse adeō ut fugae similis discessus vidērētur.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →