Mittuntur ad Caesarem cōnfestim ab Cicerōne litterae, māgnīs prōpositīs praemiīs sī pertulissent; obsessīs omnibus viīs missī intercipiuntur. Noctū ex māteriā quam mūnītiōnis causā comportāverant turrēs admodum cxx excitantur incrēdibilī celeritāte; quae dēesse operī vidēbantur perficiuntur. Hostēs posterō diē multō māiōribus coāctīs cōpiīs castra oppūgnant, fossam complent. Ā nostrīs eādem ratiōne quā prīdiē resistitur: hoc idem reliquīs deinceps fit diēbus. Nūlla pars nocturnī temporis ad labōrem intermittitur; nōn aegrīs, nōn volnerātīs facultās quiētis datur. Quaecumque ad proximī diēī oppūgnātiōnem opus sunt noctū comparantur; multae praeūstae sudēs, māgnus mūrālium pīlōrum numerus īnstituitur; turrēs contabulantur; pinnae lōrīcaeque ex crātibus attexuntur. Ipse Cicerō, cum tenuissimā valētūdine esset, nē nocturnum quidem sibī tempus ad quiētem relinquēbat, ut ultrō mīlitum concursū ac vōcibus sibī parcere cōgerētur.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →