Quantō erat in diēs gravior atque asperior oppūgnātiō, et maximē quod māgnā parte mīlitum cōnfectā volneribus rēs ad paucitātem dēfēnsōrum pervēnerat, tantō crēbriōrēs litterae nūntiīque ad Caesarem mittēbantur; quōrum pars dēprehēnsa in cōnspectū nostrōrum mīlitum cum cruciātū necābātur. Erat ūnus intus Nervius nōmine Verticō, locō nātus honestō, quī ā prīmā obsidiōne ad Cicerōnem perfūgerat suamque eī fidem praestiterat. Hic servō spē lībertātis māgnīsque persuādet praemiīs ut litterās ad Caesarem dēferat. Hās ille in iaculō inligātās effert, et Gallus inter Gallōs sine ūllā suspīciōne versātus ad Caesarem pervenit. Ab eō dē perīculīs Cicerōnis legiōnisque cōgnōscitur.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →