Caesar, cum animadverteret hostem complūrēs diēs castrīs palūde et locī nātūrā mūnītīs sē tenēre neque oppūgnārī castra eōrum sine dīmicātiōne perniciōsā nec locum mūnītiōnibus claudī nisi ā māiōre exercitū posse, litterās ad C. Trebōnium mittit, ut quam celerrimē posset legiōnem XIII., quae cum T. Sextiō lēgātō in Biturīgibus hiemābat, arcesseret atque ita cum tribus legiōnibus māgnīs itineribus ad sē venīret;
ipse equitēs in vicem Rēmōrum ac Lingonum reliquārumque cīvitātum, quōrum māgnum numerum ēvocāverat, praesidiō pābulātiōnibus mittit, quī subitās hostium incursiōnēs sustinērent.