Quod cum crēbrius accideret, ex captīvō quōdam comperit Caesar Correum, Bellovacōrum ducem, fortissimōrum mīlia sex peditum dēlēgisse equitēsque ex omnī numerō mīlle, quōs in īnsidiīs eō locō conlocāret, quem in locum propter cōpiam frūmentī ac pābulī Rōmānōs missūrōs suspicārētur.
Quō cōgnitō cōnsiliō legiōnēs plūrēs quam solēbat ēdūcit equitātumque, quā cōnsuētūdine pābulātōribus mittere praesidiō cōnsuērat, praemittit: huic interpōnit auxilia levis armātūrae; ipse cum legiōnibus quam potest maximē adpropinquat.