Hōc omnibus probātō cōnsiliō Commius Atrebās ad eōs cōnfugit Germānōs, ā quibus ad id bellum auxilia mūtuātus erat.
Cēterī ē vestīgiō mittunt ad Caesarem lēgātōs petuntque, ut eā poenā sit contentus hostium, quam sī sine dīmicātiōne īnferre integrīs posset, prō suā clēmentiā atque hūmānitāte numquam profectō esset illātūrus.
Adflīctās opēs equestrī proeliō Bellovacōrum esse; dēlēctōrum peditum multa mīlia interīsse, vix refūgisse nūntiōs caedis.
Māgnum tamen, ut in tantā calamitāte, Bellovacōs eō proeliō commodum esse cōnsecūtōs, quod Correus, auctor bellī, concitātor multitūdinis, esset interfectus. Numquam enim senātum tantum in cīvitāte illō vīvō quantum imperītam plēbem potuisse.