Barbarī cōnfīsī locī nātūrā, cum dīmicāre nōn recūsārent, sī forte Rōmānī subīre collem cōnārentur, paulātim cōpiās distribūtās dīmittere nōn audērent, nē dispersī perturbārentur, in aciē permānsērunt.
Quōrum pertināciā cōgnitā Caesar XX cohortibus īnstrūctīs castrīsque eō locō mētātīs mūnīrī iubet castra.
Absolūtīs operibus prō vallō legiōnēs īnstrūctās conlocat, equitēs frēnātīs equīs in statiōnibus dispōnit.
Bellovacī, cum Rōmānōs ad īnsequendum parātōs vidērent neque pernoctāre aut diūtius permanēre sine perīculō eōdem locō possent, tāle cōnsilium suī recipiendī cēpērunt.
Fascēs, ubī cōnsēderant (namque in aciē sedēre Gallōs cōnsuēsse superiōribus commentāriīs dēclārātum est), per manūs strāmentōrum ac virgultōrum, quōrum summa erat in castrīs cōpia, inter sē trāditōs ante aciem conlocārunt extrēmōque tempore diēī sīgnō prōnūntiātō ūnō tempore incendērunt.
Ita continēns flamma cōpiās omnēs repente ā cōnspectū tēxit Rōmānōrum. Quod ubī accidit, barbarī vehementissimō cursū refūgērunt.