Caesar mīlitibus prō tantō labōre ac patientiā, quī brūmālibus diēbus itineribus difficillimīs, frīgoribus intolerandīs studiōsissimē permānserant in labōre, ducēnōs sestertiōs, centuriōnibus †tot† mīlia nummum praedae nōmine condōnat[a pollicētur] legiōnibusque in hīberna remissīs ipse sē recipit diē XXXX. Bibracte.
Ibī cum iūs dīceret, Biturīgēs ad eum lēgātōs mittunt auxilium petītum contrā Carnūtēs, quōs intulisse bellum sibī querēbantur.
Quā rē cōgnitā, cum diēs nōn amplius XVIII in hībernīs esset morātus, legiōnēs XIIII. et VI. ex hībernīs ab Ararī ēdūcit, quās ibī conlocātās explicandae reī frūmentāriae causā superiōre commentāriō dēmōnstrātum est: ita cum duābus legiōnibus ad persequendōs Carnūtēs proficīscitur.