Cum aliquamdiū summā contentiōne dīmicārētur, Dumnacus īnstruit aciem quae suīs esset equitibus in vicem praesidiō. Tum repente cōnfertae legiōnēs in cōnspectum hostium veniunt.
Quibus vīsīs perculsae barbarōrum turmae ac perterrita aciēs hostium, perturbātō impedīmentōrum agmine, māgnō clāmōre discursūque passim fugae sē mandant.
At nostrī equitēs, quī paulō ante cum resistentibus fortissimē cōnflīxerant, laetitiā victōriae ēlātī māgnō undique clāmōre sublātō cēdentibus circumfūsī, quantum equōrum vīrēs ad persequendum dextraeque ad caedendum valent, tantum eō proeliō interficiunt.
Itaque amplius mīlibus XII aut armātōrum aut eōrum quī timōre arma prōiēcerant interfectīs omnis multitūdō capitur impedīmentōrum.