Cum repente īnstrūctās velut in aciē certō gradū legiōnēs accēdere Gallī vidērent, quōrum erant ad Caesarem plēna fīdūciae cōnsilia perlāta, sīve certāminis perīculō sīve subitō adventū sīve expectātiōne nostrī cōnsiliī cōpiās īnstruunt prō castrīs nec locō superiōre dēcēdunt.
Caesar, etsī dīmicāre optāverat, tamen admīrātus tantam multitūdinem hostium valle intermissā magis in altitūdinem dēpressā quam lātē patente castra castrīs hostium cōnfert.
Haec imperat vallō pedum XII mūnīrī, lōrīculam prō [hāc] ratiōne eius altitūdinis inaedificārī; fossam duplicem pedum quīnum dēnum lateribus dēprimī dērēctīs; turrēs excitārī crēbrās in altitūdinem trium tabulātōrum, pontibus trāiectīs cōnstrātīsque coniungī, quōrum frontēs vīmineā lōrīculā mūnīrentur; ut ab hostibus duplicī fossā, duplicī prōpūgnātōrum ōrdine dēfenderentur, quōrum alter ex pontibus, quō tūtior altitūdine esset, hōc audācius longiusque permitteret tēla, alter, quī propior hostem in ipsō vallō conlocātus esset, ponte ab incidentibus tēlīs tegerētur. Portīs forēs altiōrēsque turrēs imposuit.