Māgnā cōpiā frūmentī comparātā cōnsīdunt Drappes et Lucterius nōn longius ab oppidō X mīlibus, unde paulātim frūmentum in oppidum supportārent.
Ipsī inter sē prōvinciās partiuntur: Drappes castrīs praesidiō cum parte cōpiārum resistit; Lucterius agmen iūmentōrum ad oppidum dūcit.
Dispositīs ibī praesidiīs hōrā noctis circiter X. silvestribus angustīsque itineribus frūmentum importāre in oppidum īnstituit.
Quōrum strepitum vigilēs castrōrum cum sēnsissent, explōrātōrēsque missī quae gererentur renūntiāssent, Canīnius celeriter cum cohortibus armātīs ex proximīs castellīs in frūmentāriōs sub ipsam lūcem impetum facit.
Hī repentīnō malō perterritī diffugiunt ad sua praesidia; quae nostrī ut vīdērunt, ācrius contrā armātōs incitātī nēminem ex eō numerō vīvum capī patiuntur. Profugit inde cum paucīs Lucterius nec sē recipit in castra.