Hostēs in īnsidiīs dispositī, cum sibī dēlēgissent campum ad rem gerendam nōn amplius patentem in omnēs partēs passibus mīlle, silvīs undique impedītissimīs aut flūmine altissimō mūnītum, velut indāgine hunc īnsidiīs circumdederant.
Explōrātō hostium cōnsiliō nostrī ad proeliandum animō atque armīs parātī, cum subsequentibus legiōnibus nūllam dīmicātiōnem recūsārent, turmātim in eum locum dēvēnērunt.
Quōrum adventū cum sibī Correus oblātam occāsiōnem reī gerendae exīstimāret, prīmum cum paucīs sē ostendit atque in proximās turmās impetum fēcit.
Nostrī cōnstanter incursum sustinent īnsidiātōrum neque plūrēs in ūnum locum conveniunt; quod plērumque equestribus proeliīs cum propter aliquem timōrem accidit, tum multitūdine ipsōrum dētrimentum accipitur.