Quae nē opīniō Gallōrum cōnfīrmārētur, Caesar M. Antōnium quaestōrem suīs praeficit hībernīs; ipse cum equitum praesidiō prīdiē Kal. Iānuāriās ab oppidō Bibracte proficīscitur ad legiōnem XIII., quam nōn longē ā fīnibus Haeduōrum conlocāverat in fīnibus Biturīgum, eīque adiungit legiōnem XI., quae proxima fuerat.
Bīnīs cohortibus ad impedīmenta tuenda relictīs reliquum exercitum in cōpiōsissimōs agrōs Biturīgum indūcit, quī, cum lātōs fīnēs et complūra oppida habērent, ūnīus legiōnis hībernīs nōn potuerant continērī quīn bellum parārent coniūrātiōnēsque facerent.