Interim C. Canīnius lēgātus, cum māgnam multitūdinem convēnisse hostium in fīnēs Pictonum litterīs nūntiīsque Duratiī cōgnōsceret, quī perpetuō in amīcitiā mānserat Rōmānōrum, cum pars quaedam cīvitātis eius dēfēcisset, ad oppidum Lemonum contendit.
Quō cum adventāret atque ex captīvīs certius cōgnōsceret multīs hominum mīlibus ā Dumnacō, duce Andium, Duratium clausum Lemonī oppūgnārī neque īnfīrmās legiōnēs hostibus committere audēret, castra posuit locō mūnītō.
Dumnacus, cum adpropinquāre Canīnium cōgnōsset, cōpiīs omnibus ad legiōnēs conversīs castra Rōmānōrum oppūgnāre īnstituit.
Cum complūrēs diēs in oppūgnātiōne cōnsūmpsisset et māgnō suōrum dētrimentō nūllam partem mūnītiōnum convellere potuisset, rūrsus ad obsīdendum Lemonum redit.