Quō cum cōnfestim C. Canīnius vēnisset animadverteretque omnēs oppidī partēs praeruptissimīs saxīs esse mūnītās, quō dēfendente nūllō tamen armātīs ascendere esset difficile, māgna autem impedīmenta oppidānōrum vidēret, quae sī clandestīnā fugā subtrahere cōnārentur, effugere nōn modo equitātum, sed nē legiōnēs quidem possent, tripertītō cohortibus dīvīsīs trīna excelsissimō locō castra facit;
ā quibus paulātim, quantum cōpiae patiēbantur, vallum in oppidī circuitum dūcere īnstituit.