Īnsequentī nocte Fabius equitēs praemittit sīc parātōs ut cōnflīgerent atque agmen morārentur, dum cōnsequerētur ipse.
Cuius praeceptīs ut rēs gererētur, Q. Atius Vārus, praefectus equitum, singulāris et animī et prūdentiae vir, suōs hortātur agmenque hostium cōnsecūtus turmās partim idōneīs locīs dispōnit, partim equitum proelium committit.
Cōnflīgit audācius equitātus hostium succēdentibus sibī peditibus, quī tōtō agmine subsistentēs equitibus suīs contrā nostrōs ferunt auxilium. Fit proelium ācrī certāmine.
Namque nostrī contemptīs prīdiē superātīs[que] hostibus, cum subsequī legiōnēs meminissent, et pudōre cēdendī et cupiditāte per sē cōnficiendī proeliī fortissimē contrā peditēs proeliantur, hostēsque nihil amplius cōpiārum accessūrum crēdentēs, ut prīdiē cōgnōverant, dēlendī equitātūs nostrī nactī occāsiōnem vidēbantur.