Alterō diē cum ad oppidum Senonum, Vellaunodūnum, vēnisset, nē quem post sē hostem relinqueret, et quō expedītiōre rē frūmentāriā ūterētur, oppūgnāre īnstituit, eōque bīduō circumvallāvit; tertiō diē missīs ex oppidō lēgātīs dē dēditiōne, arma cōnferrī, iūmenta prōdūcī, sexcentōs obsidēs darī iubet. Ea quī cōnficeret C. Trebōnium lēgātum relinquit; ipse ut quam prīmum iter cōnficeret, Cēnabum Carnutum proficīscitur; quī tum prīmum adlātō nūntiō dē oppūgnātiōne Vellaunodūnī, cum longius eam rem ductum īrī exīstimārent, praesidium Cēnabī tuendī causā, quod eō mitterent, comparābant.
Hūc bīduō pervēnit. Castrīs ante oppidum positīs, diēī tempore exclūsus in posterum oppūgnātiōnem differt, quaeque ad eam rem ūsuī sint mīlitibus imperat; et, quod oppidum Cēnabum pons flūminis Ligeris contingēbat, veritus nē noctū ex oppidō profugerent, duās legiōnēs in armīs excubāre iubet. Cēnabēnsēs, paulō ante mediam noctem silentiō ex oppidō ēgressī flūmen trānsīre coepērunt. Quā rē per explōrātōrēs nūntiātā Caesar legiōnēs, quās expedītās esse iusserat, portīs incēnsīs, intrōmittit atque oppidō potītur, perpaucīs ex hostium numerō dēsīderātīs quīn cunctī caperentur, quod pontis atque itinerum angustiae multitūdinī fugam interclūserant. Oppidum dīripit atque incendit, praedam mīlitibus dōnat; exercitum Ligerim trādūcit atque in Biturīgum fīnīs pervēnit.