Eporēdorīx Haeduus, summō locō nātus adulēscēns et summae domī potentiae, et ūnā Viridomārus, parī aetāte et grātiā sed genere disparī, quem Caesar ab Dīviciācō sibī trāditum ex humilī locō ad summam dīgnitātem perdūxerat, in equitum numerō convēnerant nōminātim ab eō ēvocātī. Hīs erat inter sē dē prīncipātū contentiō; et in illā magistrātuum contrōversiā alter prō Convictolitave alter prō Cotō, summīs opibus pūgnāverant. Ex eīs Eporēdorīx cōgnitō Litavīcī cōnsiliō mediā ferē nocte rem ad Caesarem dēfert; ōrat nē patiātur cīvitātem prāvīs adulēscentium cōnsiliīs ab amīcitiā populī Rōmānī dēficere; quod futūrum prōvideat, sī sē tot hominum mīlia cum hostibus coniūnxerint, quōrum salūtem neque propinquī neglegere neque cīvitās levī mōmentō aestimāre possit.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →