Interim Lucterius Cadūrcus in Rutēnōs missus eam cīvitātem Arvernīs conciliat. Prōgressus in Nitiobrigēs et Gabalōs ab utrīsque obsidēs accipit, et māgnā coāctā manū in prōvinciam Narbōnem versus inruptiōnem facere contendit. Quā rē nūntiātā Caesar omnibus cōnsiliīs antevertendum exīstimāvit, ut Narbōnem proficīscerētur. Eō cum vēnisset, timentīs cōnfirmat, praesidia in Rutēnīs prōvinciālibus, Volcīs Arecomicīs, Tolōsātibus circumque Narbōnem, quae loca hostibus erant fīnitima, cōnstituit; partem cōpiārum ex prōvinciā, supplēmentumque quod ex Ītaliā addūxerat in Helviōs, quī fīnīs Arvernōrum contingunt, convenīre iubet.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →