Vercingetorīx minōribus Caesarem itineribus subsequitur, et locum castrīs dēligit palūdibus silvīsque mūnītum, ab Avaricō longē mīlia passuum xvi. Ibī per certōs explōrātōrēs in singula diēī tempora quae ad Avaricum gererentur cōgnōscēbat, et quid fierī vellet imperābat. Omnīs nostrās pābulātiōnēs frūmentātiōnēsque observābat, dispersōsque, cum longius necessāriō prōcēderent, adoriēbātur māgnōque incommodō adficiēbat; etsī, quantum ratiōne prōvidērī poterat, ab nostrīs occurrēbātur, ut incertīs temporibus dīversīsque itineribus īrētur.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →