Caesar idōneum locum nactus quid quāque ex parte gerātur cōgnōscit; labōrantibus subsidium submittit. Utrīsque ad animum occurrit ūnum esse illud tempus quō maximē contendī conveniat: Gallī, nisi perfrēgerint mūnītiōnēs, dē omnī salūte dēspērant; Rōmānī, sī rem obtinuerint, fīnem labōrum omnium exspectant. Maximē ad superiōrēs mūnītiōnēs labōrātur, quō Vercassivellaunum missum dēmōnstrāvimus. Inīquum locī ad dēclīvitātem fastīgium māgnum habet mōmentum. Aliī tēla coniciunt, aliī testūdine factā subeunt; dēfatīgātīs in vicem integrī succēdunt. Agger ab ūniversīs in mūnītiōnem coniectus et ascēnsum dat Gallīs, et ea quae in terrā occultāverant Rōmānī contegit; nec iam arma nostrīs nec vīrēs suppetunt.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →