Hīs rēbus in Ītaliam Caesarī nūntiātīs, cum iam ille urbānās rēs virtūte Cn. Pompēī commodiōrem in statum pervēnisse intellegeret, in Trānsalpīnam Galliam profectus est. Eō cum vēnisset, māgnā difficultāte adficiēbātur, quā ratiōne ad exercitum pervenīre posset. Nam sī legiōnēs in prōvinciam arcesseret, sē absente in itinere proeliō dīmicātūrās intellegēbat; sī ipse ad exercitum contenderet, nē eīs quidem eō tempore quī quiētī vidērentur suam salūtem rēctē committī vidēbat.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →