Itaque sub vesperum cōnsiliō convocātō, cohortātus ut ea quae imperāsset dīligenter īndustriēque administrārent, nāvīs quās Metiosēdō dēdūxerat singulās equitibus Rōmānīs attribuit; et prīmā cōnfectā vigiliā IIII mīlia passuum secundō flūmine silentiō prōgredī ibīque sē exspectāre iubet. V cohortīs quās minimē fīrmās ad dīmicandum esse exīstimābat castrīs praesidiō relinquit; V eiusdem legiōnis reliquās dē mediā nocte cum omnibus impedīmentīs adversō flūmine māgnō tumultū proficīscī imperat. Conquīrit etiam lintrīs; hās māgnō sonitū rēmōrum incitātās in eandem partem mittit. Ipse post paulō silentiō ēgressus cum tribus legiōnibus eum locum petit quō nāvīs adpellī iusserat.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →