Cum in omnibus locīs, cōnsūmptā iam reliquā parte noctis, pūgnārētur semperque hostibus spēs victōriae redintegrārētur, — eō magis quod deūstōs pluteōs turrium vidēbant, nec facile adīre apertōs ad auxiliandum animadvertēbant, — semperque ipsī recentēs dēfessīs succēderent, omnemque Galliae salūtem in illō vestīgiō temporis positam arbitrārentur; accidit īnspectantibus nōbīs quod dīgnum memoriā vīsum praetereundum nōn exīstimāvimus. Quīdam ante portam oppidī Gallus per manūs sēbī ac picis trāditās glēbās in ignem ē regiōne turris prōiciēbat; scorpiōne ab latere dextrō trāiectus exanimātusque concidit. Hunc ex proximīs ūnus iacentem trānsgressus eōdem illō mūnere fungēbātur; eādem ratiōne ictū scorpiōnis exanimātō alterō successit tertius et tertiō quārtus; nec prius ille est ā prōpūgnātōribus vacuus relictus locus quam, restinctō aggere atque omnī parte submōtīs hostibus, fīnis est pūgnandī factus.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →