Labiēnus prīmō vīneās agere, crātibus atque aggere palūdem explēre atque iter mūnīre cōnābātur. Postquam id difficilius fierī animadvertit, silentiō ē castrīs tertiā vigiliā ēgressus, eōdem quō vēnerat itinere Metiosēdum pervēnit. Id est oppidum Senonum in īnsulā Sēquanae positum, ut paulō ante dē Lutetiā dīximus. Dēprehēnsīs nāvibus circiter L celeriterque coniūnctīs atque eō mīlitibus impositīs et reī novitāte perterritīs oppidānīs, quōrum māgna pars erat ad bellum ēvocāta, sine contentiōne oppidō potītur. Refectō ponte, quem superiōribus diēbus hostēs resciderant, exercitum trādūcit et secundō flūmine ad Lutetiam iter facere coepit. Hostēs rē cōgnitā ab eīs quī ā Metiosēdō profūgerant, Lutetiam incendī, pontīsque eius oppidī rescindī iubent; ipsī profectī ā palūde in rīpā Sēquanae ē regiōne Lutetiae contrā Labiēnī castra cōnsīdunt.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →