Intereā Commius reliquīque ducēs, quibus summa imperī permissa erat, cum omnibus cōpiīs ad Alesiam perveniunt, et colle exteriōre occupātō nōn longius mīlle passibus ā nostrīs mūnītiōnibus cōnsīdunt. Posterō diē equitātū ex castrīs ēductō omnem eam plānitiem, quam in longitūdinem mīlia passuum III patēre dēmōnstrāvimus, complent; pedestrīsque cōpiās paulum ab eō locō abductās in locīs superiōribus cōnstituunt. Erat ex oppidō Alesiā dēspectus in campum. Concurrunt hīs auxiliīs vīsīs; fit grātulātiō inter eōs atque omnium animī ad laetitiam excitantur. Itaque prōductīs cōpiīs ante oppidum cōnsistunt, et proximam fossam crātibus integunt atque aggere explent, sēque ad ēruptiōnem atque omnīs cāsūs comparant.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →