Posterō diē Caesar contiōne advocātā temeritātem cupiditātemque mīlitum reprehendit, quod sibī ipsī iūdicāvissent quō prōcēdendum aut quid agendum vidērētur, neque sīgnō recipiendī datō cōnstitissent neque ā tribūnīs mīlitum lēgātīsque retinērī potuissent. Exposuit quid inīquitās locī posset, quod ipse ad Avaricum sēnsisset, cum sine duce et sine equitātū dēprehēnsīs hostibus explōrātam victōriam dīmīsisset, nē parvum modo dētrimentum in contentiōne propter inīquitātem locī accideret. Quantō opere eōrum animī māgnitūdinem admīrārētur, quōs nōn castrōrum mūnītiōnēs, nōn altitūdō montis, nōn mūrus oppidī tardāre potuisset, tantō opere licentiam adrogantiamque reprehendere, quod plūs sē quam imperātōrem dē victōriā atque exitū rērum sentīre exīstimārent; nec minus sē ā mīlite modestiam et continentiam quam virtūtem atque animī māgnitūdinem dēsīderāre.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →