At Caesar bīduum in hīs locīs morātus, quod haec dē Vercingetorige ūsū ventūra opīniōne praecēperat, per causam supplēmentī equitātūsque cōgendī ab exercitū discēdit; Brūtum adulēscentem hīs cōpiīs praeficit; hunc monet ut in omnīs partīs equitēs quam lātissimē pervagentur; datūrum sē operam nē longius trīduō ā castrīs absit. Hīs cōnstitūtīs rēbus, suīs inopīnantibus, quam maximīs potest itineribus Viennam pervēnit. Ibī nactus recentem equitātum, quem multīs ante diēbus eō praemīserat, neque diurnō neque nocturnō itinere intermissō, per fīnīs Haeduōrum in Lingonēs contendit, ubī duae legiōnēs hiemābant; ut, sī quid etiam dē suā salūte ab Haeduīs inīrētur cōnsilī, celeritāte praecurreret. Eō cum pervēnisset, ad reliquās legiōnēs mittit, priusque omnīs in ūnum locum cōgit quam dē eius adventū Arvernīs nūntiārī posset. Hāc rē cōgnitā Vercingetorīx rūrsus in Biturīgēs exercitum redūcit, atque inde profectus Gorgobinam, Bōiōrum oppidum, quōs ibī Helvēticō proeliō victōs Caesar conlocāverat Haeduīsque attribuerat, oppūgnāre īnstituit.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →