Hīs rēbus cōnfectīs in Haeduōs proficīscitur; cīvitātem recipit. Eō lēgātī ab Arvernīs missī quae imperāret sē factūrōs pollicentur. Imperat māgnum numerum obsidum. Legiōnēs in hīberna mittit; captīvōrum circiter xx mīlia Haeduīs Arvernīsque reddit. T. Labiēnum cum duābus legiōnibus et equitātū in Sēquanōs proficīscī iubet; huic M. Semprōnium Rutilum attribuit. C. Fabium lēgātum et L. Minucium Basilum cum legiōnibus duābus in Rēmīs conlocat, nē quam ā fīnitimīs Bellovacīs calamitātem accipiant. C. Antistium Rēgīnum in Ambivarētōs, T. Sextium in Biturīgēs, C. Canīnium Rebilum in Rutēnōs, cum singulīs legiōnibus mittit. Q. Tullium Cicerōnem et P. Sulpicium Cabillōnī et Matiscōne in Haeduīs ad Ararim reī frūmentāriae causā conlocat. Ipse Bibracte hiemāre cōnstituit.
Hīs rēbus ex Caesaris litterīs cōgnitīs Rōmae diērum vīgintī supplicātiō redditur.