Caesar ex castrīs equitātum ēdūcī iubet, proeliumque equestre committit; labōrantibus iam suīs Germānōs equitēs circiter cccc submittit, quōs ab initiō sēcum habēre īnstituerat. Eōrum impetum Gallī sustinēre nōn potuērunt, atque in fugam coniectī multīs āmissīs sē ad agmen recēpērunt; quibus prōflīgātīs rūrsus oppidānī perterritī comprehēnsōs eōs quōrum operā plēbem concitātam exīstimābant ad Caesarem perdūxērunt sēsēque eī dēdidērunt. Quibus rēbus cōnfectīs Caesar ad oppidum Avaricum, quod erat maximum mūnītissimumque in fīnibus Biturīgum atque agrī fertilissimā regiōne, profectus est; quod eō oppidō receptō cīvitātem Biturīgum sē in potestātem redāctūrum cōnfīdēbat.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →