Caesar nūntiīs ad cīvitātem Haeduōrum missīs quī suō beneficiō cōnservātōs docērent, quōs iūre bellī interficere potuisset, tribusque hōrīs [noctis] exercituī ad quiētem datīs castra ad Gergoviam movet. Mediō ferē itinere equitēs ā Fabiō missī quantō rēs in perīculō fuerit expōnunt; summīs cōpiīs castra oppūgnāta dēmōnstrant, cum crēbrō integrī dēfessīs succēderent nostrōsque adsiduō labōre dēfatīgārent, quibus propter māgnitūdinem castrōrum perpetuō esset īsdem in vallō permanendum; multitūdine sagittārum atque omnī genere tēlōrum multōs volnerātōs; ad haec sustinenda māgnō ūsuī fuisse tormenta; Fabium discessū eōrum, duābus relictīs portīs, obstruere cēterās pluteōsque vallō addere et sē in posterum diem similemque cāsum adparāre. Hīs rēbus cōgnitīs Caesar summō studiō mīlitum ante ortum sōlis in castra pervēnit.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →