Collis erat lēniter ab īnfimō acclīvis. Hunc ex omnibus ferē partibus palūs difficilis atque impedīta cingēbat, nōn lātior pedibus L. Hōc sē colle interruptīs pontibus Gallī fidūciā locī continēbant, generātimque distribūtī [in cīvitātīs] omnia vada [ac saltūs] eius palūdis obtinēbant, sīc animō parātī ut, sī eam palūdem Rōmānī perrumpere cōnārentur, haesitantīs premerent ex locō superiōre; ut, quī propinquitātem locī vidēret, parātōs prope aequō Mārte ad dīmicandum exīstimāret; quī inīquitātem condiciōnis perspiceret, inānī simulātiōne sēsē ostentāre cōgnōsceret. Indīgnantīs mīlitēs Caesar, quod cōnspectum suum hostēs ferre possent tantulō spatiō interiectō, et sīgnum proelī exposcentīs, ēdocet quantō dētrimentō et quot virōrum fortium morte necesse sit cōnstāre victōriam; quōs cum sīc animō parātōs videat ut nūllum prō suā laude perīculum recūsent, summae sē inīquitātis condemnārī dēbēre, nisi eōrum vītam laude suā habeat cāriōrem. Sīc mīlitēs cōnsōlātus eōdem diē redūcit in castra; reliquaque quae ad oppūgnātiōnem oppidī pertinēbant administrāre īnstituit.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →