Mūrus oppidī ā plānitiē atque initiō ascēnsūs rēctā regiōne, sī nūllus ānfrāctus intercēderet, MCC passūs aberat; quicquid hūc circuitūs ad molliendum clīvum accesserat, id spatium itineris augēbat. Ā mediō ferē colle in longitūdinem, ut nātūra montis ferēbat, ex grandibus saxīs VI pedum mūrum quī nostrōrum impetum tardāret praedūxerant Gallī atque, īnferiōre omnī spatiō vacuō relictō, superiōrem partem collis ūsque ad mūrum oppidī dēnsissimīs castrīs complēverant. Mīlitēs datō sīgnō celeriter ad mūnītiōnem perveniunt eamque trānsgressī trīnīs castrīs potiuntur. Ac tanta fuit in castrīs capiendīs celeritās ut Teutomatus, rēx Nitiobrigum, subitō in tabernāculō oppressus, ut merīdiē conquīēverat, superiōre parte corporis nūdā, volnerātō equō vix sē ex manibus praedantium mīlitum ēriperet.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →