Opere īnstitūtō fit equestre proelium in eā plānitiē quam intermissam collibus tria mīlia passuum in longitūdinem patēre suprā dēmōnstrāvimus. Summā vī ab utrīsque contenditur. Labōrantibus nostrīs Caesar Germānōs submittit legiōnēsque prō castrīs cōnstituit, nē qua subitō inruptiō ab hostium peditātū fīat. Praesidiō legiōnum additō nostrīs animus augētur; hostēs in fugam coniectī sē ipsī multitūdine impediunt atque angustiōribus portīs relictīs coartantur. Germānī ācrius ūsque ad mūnītiōnēs sequuntur. Fit māgna caedēs; nōn nūllī relictīs equīs fossam trānsīre et māceriam trānscendere cōnantur. Paulum legiōnēs Caesar quās prō vallō cōnstituerat prōmovērī iubet. Nōn minus quī intrā mūnītiōnēs erant Gallī perturbantur; venīrī ad sē cōnfestim exīstimantēs ad arma conclāmant; nōn nūllī perterritī in oppidum inrumpunt. Vercingetorīx iubet portās claudī, nē castra nūdentur. Multīs interfectīs, complūribus equīs captīs, Germānī sēsē recipiunt.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →