Hīs rēbus agitātīs profitentur Carnutēs sē nūllum perīculum commūnis salūtis causā recūsāre, prīncipēsque ex omnibus bellum factūrōs pollicentur; et, quoniam in praesentiā obsidibus cavēre inter sē nōn possint, nē rēs efferātur, ut iūre iūrandō ac fidē sanciātur petunt, conlātīs mīlitāribus sīgnīs (quō mōre eōrum gravissima caerimōnia continētur), nē factō initiō bellī ab reliquīs dēserantur. Tum conlaudātīs Carnutibus, datō iūre iūrandō ab omnibus quī aderant, tempore eius reī cōnstitūtō, ā conciliō discēditur.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →