Posterō diē Vercingetorīx conciliō convocātō id bellum sē suscēpisse nōn suārum necessitātum sed commūnis lībertātis causā dēmōnstrat; et quoniam sit fortūnae cēdendum, ad utramque rem sē illīs offerre, seu morte suā Rōmānīs satisfacere seu vīvum trādere velint. Mittuntur dē hīs rēbus ad Caesarem lēgātī. Iubet arma trādī, prīncipēs prōdūcī. Ipse in mūnītiōne prō castrīs cōnsīdit; eō ducēs prōdūcuntur. Vercingetorīx dēditur; arma prōiciuntur. Reservātīs Haeduīs atque Arvernīs, sī per eōs cīvitātīs recuperāre posset, ex reliquīs captīvīs tōtī exercituī capita singula praedae nōmine distribuit.
Gradus IVLitterae
Textus et quantitātēs ex ēditiōne Greenough (1898), rēgulīs nostrīs adhibitīs. Fontēs et ratiō ēdendī →